وزیر اعظم کے مشیر اور اسٹیٹ بینک کے سابق گورنر سلیم رضانے کہا ہے کہ پاکستان کے پاس موجودہ معاشی بحران سے نکل کر استحکام تک لے جانے کا واحد راستہ زراعت کی ترقی سے ہوکر گزرتا ہے، آبادی کا دباؤ تیزی بڑھ رہا ہے جبکہ زرعی شعبہ کی نمو 2.5فیصد سالانہ تک محدود ہے ۔زرعی شعبہ کو جدید خطوط پر استوار کیا جائے تو تین سال میں خوراک کی تجارت کا خسارہ ختم جبکہ مزید تین سال میں پیداوار سرپلس کی جاسکتی ہے۔ زرعی انقلاب کے لیے پاکستان کو 60کی دہائی کی طرز کے اقدامات کی ضرورت ہے۔ ان خیالات کا اظہار انہوں نے مقامی ہوٹل میں منعقدہ کانفرنس سے بطور کلیدی مقرر خطاب کرتے ہوئے کیا۔سلیم رضا نے کہا کہ مغربی ملکوں کے مقابلے میں پاکستان کی فی ایکڑ پیداوار نصف اور بہت سی فصلوں میں عالمی اوسط سے بھی کم ہے۔
