وزیر اعلیٰ سندھ مراد علی شاہ نے 46.3 ارب روپے کی لاگت سے شدید بارشوں/سیلاب سے تباہ ہونے والی 71 سڑکوں کی اوور ہالنگ/تعمیر نو کی منظوری دیدی تاکہ کام جلد ازجلد شروع کیا جا سکے۔
وزیر اعلیٰ سندھ مراد علی شاہ نے گزشتہ روز وزیراعلیٰ ہاؤس میں اجلاس کی صدارت کرتے ہوئے کہا کہ تباہ شدہ سڑکوں کی اوور ہالنگ بالخصوص چھوٹی سڑکیں جو کھیتوں کو منڈی اور مختلف دیہات کو مرکزی شاہراہوں سے جوڑتی ہیں، معیشت کی بحالی اور عوام کی سہولت و آمدورفت کیلیے بہت اہم ہیں۔
وزیراعلیٰ کو بتایا گیا کہ 23 اضلاع کی 71 سڑکیں، جن کی مجموعی لمبائی 1473.38 کلومیٹر ہے، شدید بارشوں اور سیلاب سے تباہ ہوئی ہیں، ان میں ضلع جام شورو میں 157.7 کلومیٹر طویل 6 سڑکیں، دادو میں 149.27 کلومیٹر کی 5 سڑکیں، شہید بینظیرآباد میں 106.6 کلومیٹر کی 3 سڑکیں، نوشہروفیروز میں 137 کلومیٹر کی 9 سڑکیں، حیدرآباد میں 20.4 کلومیٹر کی 2 سڑکیں، ٹنڈوالہیار میں 93.8 کلومیٹر کی 6 سڑکیں، ٹنڈو محمد خان میں 19کلومیٹر کی ایک سڑک، ٹھٹھہ میں 65 کلومیٹر کی 4 سڑکیں، سجاول میں 55.5 کلومیٹر کی 2 سڑکیں شامل ہیں۔
وزیر برائے ورکس ضیاء عباس شاہ نے وزیراعلیٰ کو بتایا کہ سڑکوں کی تعمیر ومرمت پر لاگت کا تخمینہ 46.32 ارب روپے لگایا گیا ہے۔
وزیراعلیٰ سندھ نے اسکیم کی منظوری دیتے ہوئے چیئرمین پی اینڈ ڈی حسن نقوی کو باقاعدہ حتمی شکل دینے اور جلد سے جلد کام شروع کرنے کی ہدایت کی۔
اجلاس کو بتایا گیا کہ ایشین ڈیولپمنٹ بینک (ADB) نے بھی صوبے کی کچھ بڑی سڑکوں کی مرمت کیلیے مالی معاونت پر رضامندی ظاہر کی ہے جس کیلیے ضروری دستاویزات مکمل کی جا رہی ہیں۔
